VE 鳳凰: 鳳凰本身聽人聲中頻都比較埋身，聲底比較渾厚凝聚。搭配奧菲斯令到本身厚實嘅聲底更加濃厚，中頻密度更高，音場亦都更加廣闊，但係可惜可能係比較濃厚嘅關係，雖然聽得好爽但係亦都減低左個耐聽度。搭配First times 有同奧菲斯截然唔同嘅取向，令到中高頻清晰度高左，低頻亦收快左。聽rock edm 會感覺比較好，但係人聲就失去左本身獨有嘅魔力。去到搭配Meet agains，我自己覺得係呢個組合下人聲係最好聽亦都係最舒服耐聽嘅。佢為鳳凰本身嘅聲底帶多左份模擬味，人聲嘅位置稍微拉遠左少少，比人一種更加寬鬆舒服嘅感覺。呢個搭配再配合p6pro 嘅r2r解碼聽女毒真係非常之舒服，特別係Uru 中島美嘉等日本抒情歌簡直一流，非常值得試試。
老人家 朱鸝: 朱鸝本身最大嘅賣點就係佢嘅獨特人聲調音：對比其他幾隻最大嘅分別就係更寬鬆自然，聲場更加大，人聲唔係特別埋身，但係就係有種比較獨特嘅人聲魅力，唯一缺點就係無乜低頻。對比原線1960s下，奧菲斯再擴大左本身已經夠大嘅音場，同加再加強獨有嘅中頻人聲染色，補上量更多嘅厚暖低頻；First Times 就提高整體人聲同樂器嘅細節清晰度，低頻感覺量無奧菲斯咁多但對比1960s速度更加強，如果聽小提琴，小編制古典，都係三條線入面搭配朱鸝比較好聽；而最後Meet Agains 就讓本身已經足夠寬鬆嘅人聲調得更加laid back ，會比人一個更加懶洋洋嘅感覺，而聲場亦都拉得更闊，但比奧菲斯密度低，會有一種幾特別嘅空靈感。聽d比較輕柔嘅女聲，比如王菲，個感覺都真係有啲飄飄地。但係對比三條線嘅配搭，係朱鸝下都係喜歡奧菲斯呢個組合，佢嘅中頻密度都模擬味令到朱鸝直接變成完全體。朱鸝+奧菲斯嘅組合始終係我最喜歡嘅組合之一，係我心目中聽人聲第一位。
Aroma 661: 我自己覺得661係奧丁嘅升級版，高頻同空間感係佢嘅賣點，有種華麗得黎又唔太刺激嘅感覺。搭配奧菲斯會令661變得更偏向人聲，係唔影響空間感嘅前提下，令到人聲更加濃郁更有味道，佢聲底同朱鸝係兩種取向，一個偏向解析，一個偏寬鬆，都非常好聽。而係First Times加持下反而令到細節弱音位更加突出，係原有取向下繼續推進升級，我特別鍾意攞呢個組合黎聽古典小提琴，色士風，啲刷弦聲空氣感表現實在非常過癮；到Meet Agains，係呢個搭配下661個空間感更加出，聲場都撐大左，但係信息量相比First Times就略遜一籌，反而表現相對中規中矩，無特別改變取向嘅情況下相對比較平均。三條線中661我比較喜歡用first times 黎聽古典同樂器，感覺佢最match。
UM 群星之上: 群星有咁多隻耳機都無比較獨特嘅聲場同低頻，可能受到骨傳導單元嘅加持，佢個聲場有個好明顯嘅感覺係超出耳機本體嘅感覺。原線Deep of Universe 下群星其實已經非常出色，相對速度感偏快同埋動態比較大。係奧菲斯嘅加持下人聲更加毒之餘低頻下潛亦都變得更加深，3D感亦都變得更加強烈，我覺得係一個全面提升嘅組合；First Times 相對走向有啲似Deep of Universe，雖然兩條都係屏蔽，但係我感覺係First Times 底下背景感覺更加乾淨，樂器分離度同埋分析力比係咁多條線下都係最好，但係低頻相對收快左少少，比較斯文無本身咁震撼。係Meet Agains 底下，我都幾喜歡佢加強嘅氣氛感同埋空氣感，雖然人聲無奧菲斯咁毒，但係可以特化表現群星嘅骨傳導3D特性，聽大編制古典如1812呢啲個感覺亦非常特別。係群星下我覺得Meet Agains 同奧菲斯我覺得不相伯仲，一個人聲，一個追求3D感，我自己就覺得50/50要睇心情啦。
總結: 聽完整整星期六日兩日反覆來回對比後，我覺得Meet Agains 絕對係可以去到差唔多奧菲斯 First Times 呢個水平。整體感覺係唔同耳機搭配下都可以令到人聲更加寬鬆自然有少少analog 味道，拉闊左成個空間感。雖然佢無去到First Times嘅細節信息量速度感，亦無奧菲斯呢種人聲濃情特化加強，但係都有屬於佢自己獨特嘅特色。整體係我自己聽感黎講，非常適合搭配一啲相對濃聲高密度嘅耳機，例如鳳凰呢一類，提升耐聽度之餘亦加強空間感。

--------------- 詳細原文按此 ---------------